БАЯНЧАНДМАНЬ СУМЫН ЗАМТ БАГИЙН ФЕРМЕР Д.МӨНХБАТАД “АЙМГИЙН АВАРГА ФЕРМЕР” ЦОЛ ТЭМДГИЙГ ГАРДУУЛАН ӨГЛӨӨ

2021 онд сүү хүлээн авах төв буюу “Илт оргил хоршоо”-г байгуулан сүү тушаах бэрхшээлийг амжилттай шийдвэрлэж, хоршоогоо чадварлаг удирдан бэлчээрийн даац хэтэрсэн өнөө үед малын тоогоо цөөрүүлж нэгжээс авах ашиг шимийг нэмэгдүүлэх тал дээр онцгойлон анхааран ажиллаж байгаа Баянчандмань сумын Замт багийн фермер Д.Мөнхбатад “Аймгийн аварга фермер” цол тэмдгийг аймгийн Засаг дарга Д.Мөнхбаатар гардуулан өглөө.

“Илт Оргил хоршоо” нь өдөртөө 5 тонн сүү хүлээн авах хүчин чадалтай бөгөөд 4 хүнийг ажлын байраар хангаж, өдөртөө хоршооны гишүүд болох 90 фермер, малчид, мал бүхий иргэд техникийн шаардлагад нийцсэн сүүгээ үндэсний томоохон үйлдвэрлэгч “Сүү” ХК-д нийлүүлж байна. Мөн фермерүүддээ үйлдвэрийн үнээр 4 төрлийн тэжээлийг нийлүүлдэг бөгөөд сүү, махны эрчимжсэн аж ахуйн чиглэлээр 1994 оноос эхлэн 28 жил тогтвортой үйл ажиллагаа явуулж байгаа юм. Энэ хугацаанд Монбилярд, Норманд, Алатау, Хар тарлан үүлдрийн сүүний үхэр дагнан үржүүлж жилдээ 66-115,7 тн сүү, нэг үнээнээс дунджаар 3894 л сүү саадаг бөгөөд цэвэр үүлдрийн бух болон зохиомол хээлтүүлэг хийж үхэр сүргийнхээ үүлдэрлэг байдал, ашиг шимийг нэмэгдүүлэхэд анхаарч ажиллаж байна.